**Chrismat Ga Shagawp**

X’mas ten du wa jang,
Bumga na mare hpe bai myit mang.
X’mas hpe hkalum ai bapa htu,
Tsaw manang ni hte rau sha lu.

Chrismat ngu ai hpa rai ta,
Kabu gara hkamla ai shata,
Nang ngai yawng a myit masin hta,
Chrismat a nam chyim hpe chye mai nga.

Mari a madat mara ai lam hta,
Hkye madu Meshia a kanu tai lu sa.
Shatsam hkrum ai bungli hpe, Yosep hkap la,
Meshia a shinggyim kawa tai lu sa.

Yuda mung na Betlehem hta,
Hkye hkrang la Madu du sai da,
Hpa chyi rawng ni, kan tam lawm,
Herot Hkawhkam, ning-yun bu hkawm,
Sagu rem ni, kabu gara shiga tsun gajai bu,
Yubak kap ai anhte matu du sai da lu.

Hkristuq ngu ai madu gaw,
David a mare e, shangai sai da law.
Moi gaw, Wu shat wakang hta shangai wa,
Ya gaw, na a myit masin hta shangai mayu nga.
Hkaptau la na, jin sai kun lu,
Hkyela madu hpe hkalum na matu lu.

Madu Yesu a matsun mungga,
Tsawra myit a lam chyu tsun da.
Lamu ga apart htum du hkra,
Nanhte hte rau dinggrin nga na nga.
Dai ga hpe, ya jang anhte dum hprang,
Gawng run ai myit masin hte, kyu hpyi sit shang.

Madu a tsaw myit wa,
nye ntsa gade ram kaba,
Panglai zai bru hte pyi, shadawn n lu hkra,
Kaba la ai tsaw myit ndai,
Na kraw hta prat tup matsing da na hkrai.

X’mas hte seng ai ga hkum masum,
Dai hpe na kraw hta, bang da yang lum,
(Love) ngu ai tsaw ra myit a lam,
(Peace) ngu ai ngui pyaw simla lam,
(Joy )ngu ai Kabu gara ai lam,
Na chying kabu gara ai shiga ndai,
Ya jang, htawn tsun na anhte lit nan tai.

Prat madang shachyut,
Chyumlaika dum hprut,
Dam hkawm ai amyu gaw n tai ga lu yaw.
Dai hpe dum let , ya jang rawt sa
X’mas poi a noqkuq hta.

Ga shagawp ai wa-………

Myu tsaw shayi, Zaiwazomyi

Yawng a ntsa Wa Karai Kasang bausin nga u ga law.

Jamungdan