German du jinghpaw ni a hkrumzup hpawng

Karai Kasang a chyeju majaw, laiwa sai laban 12.7.09 ya shani hta, German du jinghpaw ni hkrumzup ai akyu hpyi hpawng hpe, Germany Düsseldorf Myo kaba kaw galaw lai wa sai re. Sa du shang lawm ai ni yawng gaw, marai 20 jan re.
Ndai hkrumzup hpawng hpe laning mi hta, lahkawng lang galaw na matu bawngban jahkrup tawm da ai hte maren, lu galaw hkra mung shakut nga ai hku re.

Ya bai du na December shata hta mung, Chrismat poi hpe rau jawm galaw lu na matu bawnban tawn da sai lam shana dat ai re. Galaw na shara gaw, Claushtal hte Düsseldorf ngu nna, shara lahkawng kaw masat da ai. Ni wa jang she bai shana hkat na hku re. Shang lawm mayu ai ni yawng hpe mung saw shaga dat n-ngai law.

Hkrumzup hpawng a Lamang ni hta,
1. Manam hkalum ai lam
2. Shachyen shaga ai lam
3. Mahkawn sharin ai lam
4. Nawku dawjau ai lam ni hte,
5. Shawnglam hta matut galaw sa wa na lam ni bawngban ai .
6. Hkrumzup malu masha hpe rau sha jawm sha ai
Lam ni hpe lu galaw la lu sai re.

Hkrumzup hpawng a yaw shada ai lam,
Hkrumzup hpawng a yaw shada ai lam gaw, anhte German du jinghpaw amyu ni mung, lani hte lani grau grau nna mungkan hta galu kaba wa ai amyu, makam masham hta ngang grin ai amyu, masha amyu ni a man hta, amyu langai hku nna, lu tsap wa lu na matu hte kahkyin gumdin lu na matu yaw shada ai lam re. Dai majaw anhte gaw na lit, nye lit, na amu, nye amu ngu ginghka ai lam nnga hkat ai sha grau nna tsu hprang ai amyu byin tai lu na matu yaw shada ai re.

Kachin ngu ai anhte jinghpaw amyu ni gaw, Karai Kasang tsawra ai amyu langai re. Moi ganoi noi htum mat sai rai tim, daini Mungkan jut shara shagu hta anhte jinghpaw amyu ni chyambra nga lu ai gaw, Wa Karai a chyeju majaw sha re hpe galoi mung myitdum nga ga.

Dai ni anhte ni gaw, Mungdan kaba hkan du hkawm mat wa tim, tinang a htunghking, tinang a amyu, tinang a daidaw buga, tinang a mung, tinang a ga hpe n malap kau ai sha, Karai Kasang a chyeju hpe mung galoi mung shakawn chye ai ni tai nga ga i.
Prat madang shachyut,
Chyumlaika dum hprut,
Dam hkawm ai amyu gaw n tai ga lu yaw.
Tsawra ai WP myu sha ni e................!

Yawng hpe KK bausin nga u ga,
Ka lajang ai Ja Mungdan re.

Ndai ma masum gaw, German du jinghpaw num ni, Germany ga e shangai ai ma ni rai nga mali ai. lapran na ma gaw num sha re, ya she shata mi ladu hkrum ai re. German kaw shangai ai mani yawng mali rai sai, la masum, num langai re. la kasha langai gaw n lu sa du ai majaw sumla kaw n lawm ai re.
Ya hpang de German ga kaw up sha na ni re.

Ndai gaw hkrumzup malu masha re. Shatmai ni hkrum hkra re. Nai si-mai ntsin, nga shan hpe jinghpaw hku shadu ai, Nga shan hpe kala hku shadu ai, namlap gangau, lahpet tuk, mahkri sum japhtu, pung yeychyi tok hte hkrang hkri ni re. ra ai ni mai la sha ai yaw.


Ndai gaw, Rhein hka gingau langai a sumla re. Karai hpan tawn da ai kaw na, yu n law la ai pyaw chyai gingau langai mi rai nga ai.

Yawng a ntsa Wa Karai bau sin nga u ga,
Ka lajang ai,
Jamungdan

Type rest of post here